Xose Antón "Ambas""Investigaciones de Campu - Métodu de trabayu"

Coses de mio vida.Ambás.

Nací n’añu 1974, faltaba un añu pa que morriera Pachu.

Nací n’Ambás, pueblu de la zona montañosa que se conoz como Salcéu na parte sur del conceyu Grau, nun me gusta el nomatu “moscón” préstame más el de “salcedanu”.

Presumo por nacer n’Ambás y non nel hospital onde ya paso abondo tiempu.

Crianonme los güelos como a tolos neños de pueblu pq los padres tenían abondo col ganáu y a mi tocome esa época na que pasamos de tener cuatro vaques a tener doce y dempués venti, tocáronme les obres de toles cuadres grandes, el cambiu de tolos carros y parexes de vaques xuncies a los primeros tratores de la parroquia.

Tamién me tocó un cambiu grande cola escuela, ya eramos pocos neños y tuvimos que baxar a Grau al colexu pq zarraron toles escueles rurales.

Entamé a la escuela con cinco años y tolos dies camín de Grau, un kilometru y mediu en taxi hasta Cubia na xeneral y doce kilometros na camioneta hasta Grau.

Tol dia na escuela, comiase allí y na invernada salía d’Ambás denueche y llegaba denueche.

La mio mayestra n’Ambás era “bulita” como decimos los ocidentales, la güela y la persona que más quería bulitu.

Mio madre foi de Cubia na mesma parroquia y casose en ca Sanchu d’Ambás con Sanchu que ye mio pa, ella llámase Minina y llevó la tradición del quesu a Ambás.

Siempre vivimos del ganáu y del quesu d’afuega’l pitu.

Los veranos a la yerba y cuando s’acababa pasaba unos dies colos güelos n’Aviles en casa los tios, nun había vacaciones era ir a San Agustín d’Aviles, muchos salcedanos ente ellos parte de la mio familia foi trabayar p’Avilés.

En Grau taba la escuela de los de la villa y la de los de pueblu que pa mi yera la meyor,

llámase el colexu “La Virxen del Freisnu”y había un profesoráu mui interesante que de xuru ya me influenció n’apreciu pola cultura trad.Siendo un neñu subí a Ambás con unos mayestros pa que grabaran a mio buela filando la llana.

Con catorce años regalaronme una gaita pq tenía mucha afición, mio padre siempre cantó bién la tonada y mio güela ye gran conocedora del repertoriu tradicional de la mio zona:mameilo en casa.

Entamé cola gaita solu y dempués col grupu Seronda de Teberga y Filón d’ochobre de Grau, la gaita yera la mio pasión.

Con quince años grabé a mio güela y una vecina cantares vieyos, ahí entamó la verdadera afición que foi y ye el recoyer tradición oral n’Asturies.

Acabáu l’institutu en Grau colé pa Uviéu pa estudiar enfermería.

N’esos tres añinos de carrera del 93 al 95 conocí a muncha xente del mundiu de la música tradicional y formamos N’ARBA.

N’Arba ye’l mio primer grupu y entá tamos funcinando, foi en esti grupu pal primer discu onde me decido a cantar una canción que yo recoyera en conceyu Grau:”Los xatos pintos”, dende esa grabación p’acá aficioneme más a la canción tradicinal y arrequexé la gaita.

Con N’Arba sacamos dos Cds y tamos preparando’l terceru, recorrimos tola xeografía asturiana y algo de fuera pero más en casa.

Yo dende’l 95 entamo a trabayar nel Hospital xeneral d’Asturies como enfermeru, primeru nes unidades de UVI y dempués na REANIMACIÓN QUIRURXICA DEL HOSPITAL XENERAL onde ya llevo seis años, toi mui contentu n’esti trabayu y conozo munchos pacientes qu’acaben siendo bonos informantes de cultura tradicional, tengo algunes grabaciones del mio archivu feches a pacientes de la mio unidá, cantar y contar siempre-yos vien bién pa la recuperación.

El trabayu de recoyida ye a lo que más tiempu dedico de la mio vida, ye una llabor guapa y rxente pola pérdida d’estos interesantes materiales de la nuesa cultura tradicional.

Del mio archivu salen materiales pa grupos asturianos de folk o música tradicional, cortes de grabaciones d’interés llingüisticu pal atles sonoru de la llingüa etc pero sobre todo ye la mio materia prima en tolos proyeutos musicales nos qu’ando metiu.

Na invernada del 2003 creamos esti triu de TUENDA y tamos mui contentos cola bona acoyida d’ esti primer discu que sacamos.

En Tuenda tol material pertenez al mio archivu y repasamos tola xeografía d’Asturies, diferentes sones y temátiques asina como’l respetu a les diferentes variantes llingüistiques del nuesu idioma.

Celestina ca Sanchu d’Ambás,”Bulita”con 84 años ye la persona cola que más aprendí de música tradicional pq los sos cantares durmieronme de neñu y medré con ellos, tamos a puntu de sacar un Cd xuntos cola música trad. del so repertoriu que ye realmente la mia.

Esti ye’l mio resumen.